Úrvalsstæði KEF - einfaldara ferli og betri upplifun
Viðskiptavinur
Þjónusta
Sjálfsafgreiðslulausn
Markmið
Með Miðjunni, sjálfsafgreiðslulausn frá Origo, hefur ferlið í kringum úrvalsstæðaþjónustu Keflavíkurflugvallar verið einfaldað til muna.
Einkabíllinn er besti vinur Íslendinga
Þegar við leggjum leið okkar til útlanda er einkabíllinn vinsælasti kosturinn. Það getur verið áskorun að leggja bílnum á flugvellinum þar sem tímafrekt er að finna laust stæði og muna síðan í kjölfarið hvar bílnum var lagt þegar heim er komið. Bílastæðaþjónusta KEF hefur leyst þetta vandamál með Úrvalsstæðunum sínum. Sú þjónusta hentar þeim sem vilja leggja nálægt flugstöðinni og vilja nálgast hlýjan bíl fljótt og örugglega eftir að komið er heim. Origo og Keflavíkurflugvöllur hafa tekið höndum saman og komið upp sjálfsafgreiðslulausn þar sem viðskiptavinir afhenda og sækja lykla í snjallbox og þurfa því ekki að bíða í biðröð eftir því að fá lyklana sína afhenta.
Ferlið einfaldað
Áður en snjallboxin voru tekin í notkun voru skil og afhending lykla með öðrum hætti. Viðskiptavinir lögðu bílnum sínum á sérmerkt stæði fyrir framan flugstöðina, fóru að þjónustuborði, auðkenndu sig og afhentu lykla. Hið sama var uppi á teningnum við heimkomu. Þetta var tímafrekt ferli, bæði fyrir farþega og starfsfólk og hætta á álagi og bið á ákveðnum tímum, t.d. á morgnana og síðdegis þegar flest flug eru. Því var leitað leiða til að halda áfram að bjóða upp á þessa þjónustu með skilvirkari hætti sem krafðist ekki mannskaps allan sólarhringinn.
Helsta áskorunin við gamla ferlið var að það þurfti mannskap á þjónustuborðið allan sólarhringinn. Keflavíkurflugvöllur var með margvíslega aðra þjónustu sem fór fram í gegnum þjónustuborðið, en eftir útfösun annarra þjónustuþátta var úrvalsstæði eina þjónustan sem fór þar fram.
Einar Gunnarsson
Verkefnastjóri bílastæðaþjónustu
Sjálfsafgreiðsla sem styður við rekstur flugvallarins
Til að mæta þessum áskorunum var tekin ákvörðun um að færa ferlið yfir í sjálfsafgreiðslu og sjálfvirkni, með það að markmiði að halda þjónustustiginu óbreyttu – eða betra – án þess að þurfa stöðuga mönnun.
Með nýju fyrirkomulagi fer afhending og skil á bíllyklum nú fram með stafrænum hætti. Hugbúnaður Origo, Miðjan, sækir bókanir í bílastæðakerfi Isavia, og sendir sjálfkrafa upplýsingar til viðskiptavina án þess að starfsfólk Bílastæðaþjónustu KEF komi þar nærri. Lausnin gerir því KEF kleift að hafa fulla yfirsýn, tryggja öryggi og bjóða viðskiptavinum sínum einfalt og þægilegt ferli, frá bókun til heimkomu.
Helstu ávinningar fyrir viðskiptavini og Keflavíkurflugvöll:
- Skilvirkara ferli: Engar biðraðir og engin þörf á þjónustuborði allan sólarhringinn.
- Bætt upplifun farþega: Skýr skilaboð, fyrirsjáanleiki og notkun auðveld.
- Rekstrarhagkvæmni: Minni handavinna og betri nýting á mannauði.
- Öryggi og aðgangsstýring: Aðeins réttir aðilar hafa aðgang að réttum bílastæðum.
- Sveigjanleiki til framtíðar: Lausnin styður áframhaldandi þróun bílastæðaþjónustu flugvallarins.
Svona virkar þjónustan í dag
Viðskiptavinir bóka Úrvalsstæði líkt og áður í gegnum vef Keflavíkurflugvallar. Stuttu fyrir brottför fá þeir tölvupóst með skýrum leiðbeiningum um afhendingu bíllykla. Viðskiptavinir leggja bíl í sérmerkt stæði við inngang í brottfararsal. Við komu í brottfararsal skila þeir lyklunum í snjallbox.
Starfsfólk bílastæðaþjónustu KEF sér síðan um að færa bílinn á öruggt stæði. Við heimkomu er bílnum síðan komið fyrir á sérmerktu stæði uppi við flugstöðina, þar sem búið er að skafa og gera allt tilbúið. Starfsfólk setur lykla í snjallbox í komusal og um leið fær viðskiptavinur skilaboð um hvar og hvernig hann sækir bíllyklana ásamt upplýsingum um hvar bíl er lagt.
Allt ferlið er hannað með það að leiðarljósi að vera einfalt, öruggt og án óþarfa biðar. Viðbrögð viðskiptavina hafa ekki staðið á sér. Gríðarleg ánægja er með þjónustuna þar sem einfaldleikinn er hafður í fyrirrúmi.
